Markalaust jafntefli hjá Englandi og Alsír

Englendingar náðu aðeins markalausu jafntefli á móti Alsír í öðrum leik sínum á HM í Suður-Afríku í kvöld og þurfa því að bíða enn lengur eftir fyrsta sigri sínum í keppninni.

Enska liðið er í 3. sæti riðilsins eftir fyrstu tvær umferðirnar og verður að öllum líkindum að vinna Slóveníu í lokaleiknum til að komast áfram í 16 liða úrslitin. Slóvenía er með fjögur stig en enska liðið er með tvö stig eins og Bandaríkin en hefur skorað tveimur mörkum minna.

Enska liðið virkaði þreytulegt og áhugalítið í þessum leik í kvöld og þeir sköpuðu sér ekki mikið gegn vinnusömu og skipulögðu alsírsku liði.

Sendingamistök, taktleysi í spili og skelfilegar hornspyrnur er eitthvað sem menn eiga ekki von á frá enska landsliðinu en var saga þessa leiks.

Fabio Capello, landsliðsþjálfari enska liðsins, hefur ekki náð að kveikja í sínum mönnum og þetta var örugglega ekki skemmtilegur afmælisdagur fyrir hann. Hann var líka of seinna að bregðast við þegar öllum var ljóst að sóknarleikur liðsins var ekki að ganga upp.

David James stóð í enska markinu í gær og hélt hreinu en hann var 7 árum og 8 dögum eldri en dómari leiksins Ravshan Irmatov.

Wayne Rooney lék þarna sinn sjöunda landsleik í röð án þess að ná að skora en það oft erfitt að ímynda sér það, horfandi á þennan leik, að þarna færi maðurinn sem fór illa með varnarmenn mótherja Manchester United á síðasta tímabili.