Adolfo Bautista: Síðasta tækifærið mitt er á móti Íslandi

Adolfo Bautista verður í eldlínunni með landsliði Mexíkó í leiknum á móti Íslandi aðra nótt og lítur á þennan leik sem síðasta tækifæri sitt til þess að vinna sér sæti í HM-hópnum. Þetta verður fyrsti landsleikur þessa 30 ára og 186 sm framherja síðan 2008.

„Ég lít svo á að síðasta tækifærið mitt sé þessi leikur á móti Íslandi," sagði Bautista við dagblaðið í Guadalajara. „Ég finn samt ekki fyrir neinni pressu og ætla bara að njóta leiksins," sagði Bautista sem hefur skorað 9 mörk í 31 landsleik fyrir Mexíkó.

Adolfo Bautista var inn og út úr landsliðinu frá 2002 til 2006 en varð síðan fastamaður undir stjórn Hugo Sanchez. Hann hefur síðan ekki spilað landsleik síðan að Hugo Sanchez var rekinn.