BBC segir endanlega ljóst að Beckham missi af HM

BBC-fréttastofan sagðist nú undir kvöld hafa heimildir fyrir því að það sé endanlega staðfest að David Beckham eigi enga möguleika á að spila á HM í sumar.

Beckham gekkst undir aðgerð í Finnlandi seinni partinn í dag. Fyrst þá kom endanlega í ljós hversu alvarlega ökklameiðsli Beckhams væru en hann meiddist á hásin.

Það voru afar litlar líkur á því fyrir aðgerðina að Beckham myndi ná HM en það á svo að hafa endanlega komið í ljós áðan að Beckham mun ekki ná að spila á sinni fjórðu heimsmeistarakeppni í röð.

Læknirinn sagði aðgerðina annars hafa gengið vel en hún tók 50 mínútur. Þó svo aðgerðin hafi gengið vel tekur það líkamann langan tíma að jafna sig eftir slík meiðsli.

Þess vegna gerir læknirinn ekki ráð fyrir því að Beckham fari til Suður-Afríku.

Beckham verður í gifsi í sex til átta vikur. Eftir það má hann byrja endurhæfingu.