Var með kaloríur á heilanum

Þýska leikkonan Diane Kruger er hætt að vera með þyngdina á heilanum.

Fyrirsætan sem varð leikkona hefur talið ofan í sig kaloríurnar í gegnum tíðina til þess að vera sem grennst. Hún taldi kaloríurnar í öllu sem hún setti ofan í sig því hún ætlaði sér að vera grönn dansandi ballerína alveg frá unga aldri.

Í dag er Diane 34 ára gömul og er loksins hætt að telja kaloríurnar. Hún slakar á og nýtur þess að vera til og borða það sem hana langar í.

„Ég er ekki lengur í stærð núll en ef ég dvel lengi í Þýskalandi borða ég of mikið af kökum og þyngist þá á ógnarhraða. Ég er ekki með kaloríufjöldann í fæðunni sem ég borða á heilanum lengur en þannig var ég. Sá tími er liðinn og ég ætla ekki að byrja á því aftur," sagði Diane.

Diane er byrjuð að njóta í meira mæli matarins sem hún neytir og að elda ljúffengan hollan mat. Hún elskar til að mynda stjörnukokkinn Jamie Oliver og eldar eftir uppskriftunum hans.