Balotelli heldur sig við Ítalíu - hafnar því að spila fyrir Gana

Framherjinn efnilegi Mario Balotelli hjá Ítalíumeisturum Inter hefur staðfest að hann ætli ekki að gefa kost á sér til að spila fyrir landslið Gana.

Knattspyrnusamband Gana hefur verið í sambandi við Balotelli til þess að reyna að fá hann til þess að spila fyrir landsliðið á lokakeppni HM næsta sumar en foreldrar Balotelli eru frá Gana.

Hinn nítján ára gamli Balotelli, sem á landsleiki að baki fyrir U-21 árs landslið Ítalíu, segir aðeins eitt landslið koma til greina.

„Ég hef aldrei hugsað um að spila fyrir Gana. Ef ég spila fyrir eitthvað landslið þá verður það ítalska landsliðið," segir Balotelli í viðtali við ítalska fjölmiðla í dag.