Neville ætlar sér að komast í landsliðið

Phil Neville, leikmaður Everton, hefur lýst því yfir að hann muni berjast grimmilega fyrir sæti í enska landsliðinu á HM í sumar.

Það eru ekki mörg sæti eftir í hópnum sem talið er að barist verði um en Neville ber þá von í brjósti að hann geti komist inn sem hægri bakvörður.

Wes Brown er meiddur og gæti misst sætið sitt og svo gæti eldri bróðir Phil, Gary, líka komið til greina eftir fína frammistöðu upp á síðkastið.

„Ég myndi elska að fara á HM en ef ég á að komast inn verð ég líklega síðastur og þá ef engir hægri bakverðir eru eftir," sagði hinn 33 ára gamli Neville.

„Maður spyr sig eðlilega hvort minn tími sé á enda. Ég hef samt aldrei gefið upp vonina og vonast alltaf eftir því að vera valinn.

Neville hefur ekki spilað með landsliðinu síðan 2007 og hefur aldrei farið á HM.