Verður þetta fyrir þjóðarstoltið eða bankareikninginn hjá Spánverjum?

Evrópumeistarar Spánar fá langmest í bónus af öllum liðunum 32 sem taka þátt í HM í Suður-Afríku sem hefst á föstudaginn. Þetta hefur kallað á hörð viðbrögð heima fyrir þar sem efnahagsástandið er slæmt eins og annarsstaðar í heiminum.

Stjórnmálamenn á Spáni hafa því keppst um að gagnrýna hversu mikið kemur í hlut hvers og eins leikmanns spænska landsliðsins vinnist heimsmeistaratitilinn 11. júlí næstkomandi. Spánverjar hafa aldrei orðið heimsmeistarar og það skýrir kannski að hluta til hversu upphæðin er há.

Spænskir fjölmiðlar segja að hver leikmaður fái 600 þúsund evrur fyrir heimsmeistaratitil eða um 94 milljónir íslenskra króna. Upphæðin verður þegar orðin 120 þúsund evrur á mann komist liðið í úrslitaleikinn en það eru tæpar 19 milljónir íslenskra króna.

Iker Casillas, markvörður og fyrirliði spænska landsliðsins, varði risabónusinn á blaðamannafundi í dag. Hann sagði að fjölskylda og vinir leikmannanna væru að glíma við kreppuna eins og aðrir en að það ætti ekki að blanda þessu tvennu saman.

Hér fyrir neðan er listi spænska blaðsins Marca yfir bónusa hjá nokkrum þjóðum á HM takist leikmönnum þeirra að koma með heimsmeistarabikarinn heim.

Spánn 600 þúsund evrur (94 milljónir íslenskar)

Argentína 510 þúsund evrur (80 milljónir íslenskar)

England 475 þúsund evrur (74 milljónir íslenskar)

Frakkland 390 þúsund evrur (61 milljón íslenskar)

Brasilía 180 þúsund evrur (28 milljónir íslenskar)