Muntari hraunaði yfir þjálfara Gana

Sulley Muntari hefur verið áminntur fyrir að úthúða leikmönnum og þjálfara landsliðs Gana eftir leikinn gegn Ástralíu um helgina.

Leiknum lyktaði með 1-1 jafntefli og í rútu liðsins eftir leik húðskammaði Muntari leikmenn liðsins og þjálfara, Serbann Milovan Rajevac.

Rajevac óskaði þess að Muntari yrði sendur heim en hætti við eftir að fyrirliðinn Stephen Appiah ræddi við hann.

Í yfirlýsingu frá knattspyrnusambandi Gana kom fram að Muntari hafi verið áminntur fyrir framkomuna. Þá mun hann einnig hafa beðist afsökunar.

Muntari hefur ekki átt sæti í byrjunarliði Gana á mótinu en hann varð í vor þrefaldur meistari með Inter á Ítalíu. Gana mætir Þýskalandi í lokaumferð riðlakeppninnar á miðvikudag og ræðst það þá hvort liðið kemst áfram í 16-liða úrslit.