Hoddle íhugar að taka við landsliði Nígeríu

Samkvæmt heimildum Sky Sports fréttastofunnar er Glenn Hoddle sagður vera í forystu í kapphlaupinu um landsliðsþjálfarastöðuna hjá Nígeríu.

Fyrrum landsliðsþjálfaranum Shaibu Amodu var sagt upp störfum á dögunum og hafa fjölmörg þekkt nöfn úr knattspyrnuheiminum verið nefnd til sögunnar sem líklegir eftirmenn og er Hoddle eitt þeirra.

Hoddle mun vera í viðræðum við knattspyrnusamband Nígeríu og að öllu óbreyttu gæti hann verið kynntur sem nýr landsliðsþjálfari strax um helgina.

Hoddle hefur verið án starfs síðan hann hætti sem knattspyrnustjóri Wolves árið 2006 en hann var áður stjóri Chelsea, Southampton og Tottenham ásamt því að stýra enska landsliðinu á árunum 1996-1999.

Nígeria verður sem kunnugt er með á lokakeppni HM næsta sumar og því til mikils að vinna fyrir þann aðila sem hreppir starfið.