Framtíð Rehhagel í óvissu

Þjóðverjinn Otto Rehhagel vildi ekkert tjá sig um það í gær hvort hann yrði áfram þjálfari gríska landsliðsins en hann hefur stýrt liðinu frá árinu 2001. Grikkir féllu úr leik á HM í gær er liðið lá gegn Argentínu.

"Sigur Argentínu á okkur var mjög sanngjarn. Okkur tókst að halda markinu hreinu lengi vel en Argentína er hæfileikaríkt lið og þessir hæfileikar færðu þeim sigur," sagði hinn varnarsinnaði þjálfari.

Rehhagel hefur náð mögnuðum árangri með gríska liðið og gerði það meðal annars að Evrópumeisturum.

Flestum leiðist hinn varnarsinnaði leikstíll liðsins en að slíku er ekki spurt er lið ná árangri. Árangurinn á HM var þó enginn.