Capello bjartsýnn á sigur í dag

Fabio Capello, landsliðsþjálfari Englands, er bjartsýnn á að enska landsliðið leggi Slóvena í dag og tryggi sér farseðilinn í 16-liða úrslit HM. Enska landsliðið hefur verið heillum horfið í fyrstu tveimur leikjum sínum í keppninni og er gríðarleg pressa á liðinu í dag.

"Ég er ekki klikkaður. Þegar ég sagði fyrir mótið að takmarkið væri að komast í úrslitaleikinn þá var það vegna þess að ég tel okkur hafa liðið til þess að fara alla leið. Ég tel að eftir sigur okkar á Slóveníu verðum við liðið sem þarf að vinna," sagði Capello borubrattur á fundi fyrir leikinn.

Capello fer þrátt fyrir það ekkert í grafgötur með frammistaðan hingað til hafi ekki verið ásættanleg. Hann er samt fullviss um að liðið komist á skrið með sigri í dag.

"Við stóðum okkur vel í undankeppninni en höfum ekki fylgt því eftir. Stundum bætum við okkur og stundum erum við ekki að spila eins vel og við getum. Við erum að spila yfir pari núna. Við munum berjast fyrir réttum úrslitum í dag. Orðspor mitt skiptir ekki máli heldur er það liðið. Þetta er bikarúrslitaleikur og við verðum að finna rétta andann."