Klúðraði dauðafæri aldarinnar en skoraði úr víti - myndband

Einhver ótrúlegasta sjón heimsmeistarakeppninnar í Suður-Afríku til þessa er klúður Nígeríumannsins Yakubu í leik gegn Suður-Kóreu í gær.

Nígería þurfti á sigri að halda gegn Suður-Kóreu til að komast í 16-liða úrslitin en mátti sætta sig við 2-2 jafntefli.

Þegar Nígería var undir í leiknum, 2-1, fékk Yakubu boltann fyrir galopnu marki en tókst að skjóta framhjá af örstuttu færi.

Aðeins tveimur mínútum síðar fékk Nígería víti og fór Yakubu á punktinn og skoraði af miklu öryggi. Hann var þó tekinn af velli aðeins mínútu síðar.

Atvikið og vítaspyrnuna má sjá í samantekt leiksins hér á Vísi. Samantektir úr öllum leikjum má sjá með því að smella á Brot af því besta á HM-vef Vísis, undir flipanum VefTV.