Barbara Walters tilkynnir hjartauppskurð í beinni útsendingu

Áhorfendur sjónvarpsþáttarins The View fengu óvænta tilkynningu í fangið rétt í þessu. Sjónvarpskonan Barbara Walters, sem er einn þáttastjórnandanna, sagði þarna frá því að hún sé á leiðinni í hjartauppskurð.

„Þið kannist við það hvað ég er alltaf að tala um og gera ykkur brjálaðar með það hvað ég er heilbrigð. Missi aldrei dag úr vinnu, ekki kvef í þrettán ár. Seinna í vikunni fer ég í hjartauppskurð og læt skipta um gallaða hjartaloku. Margir hafa gert þetta og ég hef vitað um þetta í nokkurn tíma," sagði Barbara.

Vinkonur Walters í þættinum, þeirra á meðal Whoopie Goldberg, voru meðal örfárra sem hún sagði frá uppskurðinum fyrir útsendingu. The View er einn vinsælasti þáttur Bandaríkjanna á daginn og er Walters einn framleiðandanna.

Upptökuna úr The View má sjá hér.