Stærstu fréttir áratugarins í knattspyrnuheiminum

Og áfram höldum við í upprifjun á áratuginum sem nú er að líða. Næst eru það einfaldlega stærstu fréttir eða atvik áranna.

Soccernet tók saman, og lesa má nánar um málið hér.

Fréttir áratugarins:

2000: Galacticos tímabil Real Madrid hefst.

Figo, Zidane, Ronaldo, Beckham. Óþarfi að lengja málið.

2001: England vinnur Þýskaland 5-1

Já, það var Englendingur sem tók saman. Engu að síður ótrúlegar tölur og það í Þýskalandi. Owen skoraði þrennu, Gerrard og Heskey sitt hvort markið.

2002: Keane sendur heim af HM

Roy Keane var rekinn heim frá Asíu til Írlands af HM eftir ósætti við Mick McCarthy stjóra liðsins. Írland komst nú samt áfram en tapaði í annarri umferð fyrir Spáni eftir vítaspyrnukeppni.

2003: Fráfall Marc Vivien Foe

Þessi ágæti kappi lést í miðjum leik í Álfukeppninni árið 2003. Dauði hans hafði mikil áhrif á knattspyrnuheiminn. Hann lést úr hjartagalla.

2004: Grikkland vinnur EM

Eitt leiðinlegasta lið keppninnar fór með sigur af hólmi. Vörn er besta sóknin sagði einhver. Eftir að hafa lent í öðru sæti í riðlinum vann liðið alla þrjá leikina sína eftir það 1-0.

2005: Liverpool Evrópumeistari

Einhver skemmtilegasti knattspyrnuleikur síðari ára. Ótrúlegur viðsnúningur Liverpool gegn AC Milan tryggði þeim sigur eftir að hafa lent 3-0 eftir fyrri hálfleikinn. Liverpool jafnaði og vann í vítaspyrnukeppni.

2006: Skandallinn á Ítalíu

Ofanrituðum fannst Zidane og geðveikin hans í kringum úrslitaleik HM reyndar ótrúlegri atvik. En skandallinn skók Ítalíu og Juventus var meðal annars dæmt niður um deild. Dómurum var mútað og titlar Juve fyrir 2005 og 2006 voru dæmdir af félaginu.



2007: Beckham fer til Bandaríkjanna

Frægasti knattspyrnumaður heims fór frá Real Madrid í sólina í Kaliforníu. Hann ætlaði að ljúka ferlinum þar en hefur reyndar farið tvisvar að láni til AC Milan þar sem hann áttaði sig á því að maður kemst ekkert í enska landsliðið ef maður spilar bara í MLS deildinni og er ekki í formi þegar stóru mótin byrja.

2008: Sykurpabbinn keypti City

Á meðan stærstu félög Englands skulda milljarða á Manchester City botnlausa brunna. Sjeikinn keypti City og fékk til sín Robinho og fleiri. Stefnir í að félagið verði ofarlega ef fram heldur sem horfir, félagið mun versla í janúar og er komið með Roberto Mancini í brúnna.

2009: Ronaldo fór loksins til Real

Einni lengstu og undir lokin leiðinlegustu sögum áratugarins lauk þegar Ronaldo skrifaði loksins undir hjá Real Madrid. Lang dýrasti leikmaður í heimi.