Þorvaldur: Auðvitað hef ég áhyggjur

Þorvaldur Örlygsson, þjálfari Fram, var ekki kátur eftir leik sinna manna í Fram gegn Stjörnunni enda Framarar teknir í bakaríið gegn spútnikliði Stjörnunnar.

"Við vorum slakir, það er ósköp einfalt. Ég skipti þremur inn í hálfleik og vonaðist eftir meiri breytingu á leik liðsins en það gekk ekki upp. Á síðustu 5 mínútunum fengum við þrjú færi til að skora því um leið og við gátum komið boltanum á rétta staði inni í teignum, þar sem þeir eru mjög slakir, þá fengum við loksins færi en það tók okkur ansi langan tíma að gera það," sagði hundfúll Þorvaldur í leikslok í samtali við Vísi.

Leikur Fram var arfaslakur í fyrri hálfleik og leikmenn gjörsamlega á hælunum og nýttu Stjörnumenn það vel. "Við lögðum upp með að vinna leikinn. Við reynum að koma boltanum í rólegheitunum upp völlinn og koma honum síðan fyrir markið en við réðum ekki við þær kýlingar sem við fengum á móti okkur og þeir sluppu því innfyrir," bætti Þorvaldur við.

Hvað Stjörnuliðið varðaði sagði Þorvaldur. "Ég get ekki dæmt um það hvort þeir séu betri en aðrir því ég hef ekki séð öll liðin. Stigin telja og menn eru dæmdir af því. Ef menn eru búnir að ná þeim þá eiga þeir skilið að vera þar sem þeir eru."

"Auðvitað hef ég áhyggjur þegar gengur illa, eins og menn fagna þegar gengur vel. Þegar gengur illa verða menn bara að taka á því og reyna að snúa gengi liðsins við, það er verkefni útaf fyrir sig. Fyrst og fremst þurfum við að fara að halda stöðugleika og auðvitað fá á okkur færri mörk," sagði Þorvaldur að lokum.