Eistnesk fyrirmenni á ferð og flugi í þekkingarheimsókn

Hópur um tíu embættis- og menntamanna frá höfuðborg Eistlands, Tallin, er í svokallaðri þekkingarheimsókn hér á landi að eigin frumkvæði.

Í hópnum eru meðal annars forseti borgarstjórnar Tallin og þarlendur hagfræðiprófessor. Þetta er fyrsta heimsókn þeirra til landsins, en þau komu að kvöldi laugardags og verða fram á miðvikudag.

Þangað til fylgja þau dagskrá sem höfuðborgarstofa útbjó fyrir þau. Meðal annars heimsækja þau Gullfoss og Geysi, þingið, Háskóla Íslands, upplýsingaþjónustu Reykjavíkurborgar og Hellisheiðarvirkjun.

Hildur Kjartansdóttir, móttöku og alþjóðafulltrúi á skrifstofu borgarstjóra, segir fólkið afar áhugasamt og finnist fróðlegt að heyra um efnahagshrunið og uppbygginguna í landinu.

„Þau hafa náttúrulega mikinn áhuga á að fá upplýsingar um stöðuna hér," segir Hildur.