Roque Santa Cruz formlega genginn í raðir Manchester City

Framherjinn Roque Santa Cruz kláraði læknisskoðun og skrifaði undir samning við Manchester City í kvöld en félagið var búið að ná samkomulagi við Blackburn í síðustu viku um kaupverð sem talið er vera í kringum 18 milljónir punda.

Hinn 27 ára gamli Cruz hittir fyrir knattspyrnustjórann Mark Hughes hjá City en Hughes fékk leikmanninn árið 2007 til Blackburn frá Bayern München á 3,5 milljónir punda.

Cruz var búinn að gefa það út að hann vildi yfirgefa Blackburn en hann hefur verið óheppinn með meiðsli síðan hann kom til Englands. Fáir efast þó um getu framherjans til þess að skora mörk í ensku úrvalsdeildinni.

„Það hjálpaði mér vissulega mikið að taka þessa ákvörðun að vita af Hughes hjá City. Ég veit hvernig hann vill spila og æfa og tilhlökkunin er því mikil að koma til Manchester. Þetta tók sinn tíma en nú get ég farið að hlakka til næsta keppnistímabils,“ segir Cruz í samtali við Sky Sports fréttastofuna.

Cruz eru önnur stóru kaup City í sumar en félagið fékk á dögunum Gareth Barry frá Aston Villa á 12 milljónir punda.