Staðfest að líkið er af Íslendingnum

Norska lögreglan hefur staðfest að lík sem fannst í stöðuvatni í grennd við Noresund í dag er af 48 ára gömlum Íslendingi sem leitað hefur verið að.

Manninum var vísað út úr rútu um klukkan eitt aðfararnótt sunnudags sökum ölvunar. Síðan hafði ekkert til hans spurst og leituðu tugir lögreglu- og slökkviliðsmanna að manninum og nutu þeir aðstoðar sjálfboðaliða Rauða krossins. Leitarhundar voru einnig notaðir við leitina. Í morgun þegar leit var fram haldið fann björgunarþyrla lík manns á floti í stöðuvatni í grennd við Noresund.