Ferguson er mjög ánægður með Antonio Valencia

Sir Alex Ferguson er afar sáttur með innkomu Antonio Valencia í lið Manchester United og það lítur út fyrir að Valencia gæti verið að fylla í skarðið á hægri vængnum sem Cristiano Ronaldo skildi eftir sig þegar hann fór til Real Madrid.

Hinn 24 ára gamli Ekvadormaður lagði upp bæði mörk Manchester United í 2-0 sigri á spænska liðinu Valencia í æfingaleik á Old Trafford í gær. Mörkin skoruðu Wayne Rooney og Tom Cleverley en sá síðarnefndi er 19 ára miðjumaður.

„Það sem skipti mig mestu í þessum leik var frammistaða Valencia. Hann var mjög, mjög góður í þessum leik. Valencia býr yfir miklu jafnvægi, hraða og krafti. Hann hefur tekið áskorunni vel að spila fyrir okkur og ég er mjög ánægður með hans framgöngu hingað til," sagði Sir Alex Ferguson.

Sir Alex var einnig ánægður með ungu leikmennina Tom Cleverley, Darron Gibson, Ritchie De Laet og Fabio. Hann var líka á því að Michael Owen hafi verið óheppin að skora ekki að minnsta kosti þrennu í þessum leik.