Ingimundur: Hefðum átt að drepa leikinn fyrr

Hinn eldsnöggi Ingimundur Níels Óskarsson var mjög líflegur í 1-3 sigri Fylkis gegn Fjölni og skoraði tvö mörk og lagði eitt upp.

Hann var ánægður með leikinn og þrjú mikilvæg stig en hefði viljað sjá Fylkismenn klára leikinn fyrr en þeir gerðu.

„Við erum auðvitað gríðarlega sáttir með að taka þrjú stig á Fjölnisvelli. Við hefðum samt kannski mátt drepa leikinn fyrr en við gerðum þar sem við fengum fín færi. Pape komst einn inn fyrir vörnina hjá Fjölni í stöðunni 0-2 og ef hann hefði skorað þá held ég að við hefðum klárað leikinn mun fyrr en við gerðum. Við héldum samt alltaf áfram sama þótt að þeir hafi skorað mark í lok fyrri hálfleiks, aðeins gegn gangi leiksins. Mér fannst við því í raun alltaf vera með þetta," segir Ingimundur.

Ingimundur segir Fylkismenn fara í alla leiki með sama hugarfari og séu alltaf líklegir til þess að skapa hættu í vörn andstæðinganna.

„Við förum í alla leiki og gefum okkur alla í þá og erum til þessa ekkert búnir að vera að misstíga okkur mikið varnarlega. Sóknarlega erum við hraðir og erum því oft fljótir að pikka upp lausu boltana og það skapar alltaf hættu. Þetta er búið að vera fínt en við erum ekkert saddir," segir Ingimundur.