Fjármálafyrirtæki hafa þegar höfðað mál gegn íslenska ríkinu

Erlend fjármálafyrirtæki hafa þegar höfðað mál gegn íslenska ríkinu og fyrirtækjum til að ná aftur fé sínu eftir bankahrunið. Þetta segja lögfræðingar hjá bresku lögfræðifyrirtæki sem nýlega lét kanna viðhorf erlendra kröfuhafa til Íslands eftir hrunið. Þeir segja marga kröfuhafa líta svo á að íslenska ríkið hafi sniðgengið þá í viðræðum um sátt.

Lögfræðingar hjá breska lögfræðifyrirtækinu Norton Rose sögðu í viðtali við fréttastofu í dag að margir hefðu leitað ráðgjafar hjá þeim um hvernig ætti að sækja mál gegn ísleska ríkinu og fjármálafyrirtækjum og sögðu þeir að þegar hefðu nokkur mál verið höfðuð en vildu ekki segja að hverjum eða hvort það væri fyrir íslenskum eða erlendum dómstól.

Samkvæmt könnun Norton Rose meðal sextíu fyrirtækja sem fjárfest hafa á Íslandi hafa níutíu og þrjú prósent þeirra íhugað að hefja lögsókn til að sækja fé sitt og telur töluverður hópur að íslenska ríkið hafi mismunað kröfuhöfum á grundvelli þjóðernis. Nánar um málið í kvöldfréttum klukkan hálf sjö.