Rooney svaf meðan dregið var í riðla á HM

Wayne Rooney var ekki eins spenntur og margir þegar dregið var í riðla fyrir HM í Suður-Afríku. Hann svaf nefnilega eins og ungabarn þegar dregið var í riðlana og vissi ekki hvernig drátturinn fór fyrr en fimm tímum síðar.

„Ég svaf til tíu um kvöldið. Við tókum lestina til London og vorum komnir á hótelið klukkan fimm," sagði Rooney en United var þar að undirbúa sig fyrir leikinn gegn West Ham.

„Ég lagðist niður til að horfa á sjónvarpið en sofnaði og vissi ekki af drættinum fyrr en fimm tímum eftir að honum lauk," sagði Rooney sem sagðist þó vera ánægður með riðilinn sem England lenti í.