Setti heims­met fyrir mömmu sína

Það mikla afrek vann ungur Breti. Sam King setti nýtt heimsmet í ofurmarkaþonghlaupum með því að hlaupa fimmtíu kílómetra hlaup á hverjum degi á 79 dögum í röð.

King gerði þetta fyrir gott málefni en einnig fyrir móður sína. Það sem gerir afrekið nefnilega enn magnaðra er sagan á bak við það. Fyrr á þessu ári lifði móðir Sams af heilablæðingu sem nærri dró hana til dauða.

Barðist í gegnum meiðsli, veikindi og lítinn svefn

Það sem byrjaði sem fjáröflun fyrir Headway-samtökin í Bretlandi breyttist í mikla þrekraun þar sem Sam mætti dag eftir dag án hvíldar og barðist í gegnum meiðsli, veikindi, lítinn svefn og vetraraðstæður.

King hóf áskorunina í september og móðir hans, Penny, var við marklínuna í heimabæ hans, Frinton-on-Sea í Essex, ásamt vinum og fjölskyldu, sem hann sagði að hefði verið „alveg magnað“.

Besta sem ég hef upplifað á ævinni

„Ég hef ekki leyft mér að hugsa lengra en einn dag í einu og ég hef ekki leyft mér að hugsa um endamarkið, en það sem gerðist rétt í þessu, fyrir framan alla þarna, var eitt það besta sem ég hef upplifað á ævinni,“ sagði Sam King við breska ríkisútvarpið.

Þessi reyndi þolíþróttahlaupari telur sig hafa slegið heimsmetið fyrir flest ofurmaraþon sem karlmaður hefur hlaupið á samfelldum dögum. King, sem var eitt sinn efsti leikmaður heims í tölvuleiknum Call of Duty, vó um 121 kg fyrir átta árum. Hann glímdi á bak við tjöldin við andlega og líkamlega heilsu sína.

Hann lagði skrifborðsáhugamálið á hilluna til að byrja að hlaupa og varð fljótlega heltekinn af erfiðum þolraunum, þar á meðal ofurmaraþonum nálægt Kilimanjaro-fjalli í Tansaníu.

En móðir hans fékk lífsbreytandi heilablæðingu fyrr á þessu ári. Hann sagði upp starfi sínu í London og flutti aftur til Essex og hefur síðan hlaupið 50 km á hverjum degi síðustu 79 daga.

Eitt fyrir hvert ár í lífi móður sinnar

King ætlaði upphaflega að takmarka sig við 74 maraþon, eitt fyrir hvert ár í lífi móður sinnar áður en hún veiktist, en hækkaði töluna „til að enda á sunnudegi, fyrir utan kirkjuna hennar mömmu“.

„Fyrstu vikurnar var ég líka mjög veikur og meiddur á meðan líkaminn var að aðlagast því sem ég var að gera, svo það var erfitt. En ég hef elskað þetta, þetta hefur verið ótrúlegt ævintýri,“ sagði King.

Mestur hluti áskorunarinnar hefur farið fram í Frinton og hann sagðist hafa safnað meira en sextíu þúsund pundum af 74 þúsund punda markmiði sínu.

Headway eru bresk góðgerðarsamtök sem vinna að því að bæta lífsgæði fólks eftir heilaskaða. Þau veita mikilvægan stuðning, þjónustu og upplýsingar til þeirra sem hafa lifað af heilaskaða, fjölskyldna þeirra og umönnunaraðila.