Fjórum núverandi þingmönnum var hafnað í prófkjörum sjálfstæðisflokksins í gær. Kosningaþátttaka var mun dræmari nú en fyrir tveimur árum eða sem nemur 20 prósentum.

Úrslit í prófkjörum Sjálfstæðisflokks í Reykjavík, Suðvesturkjördæmi og Suðurkjördæmi liggja nú fyrir.

Illugi Gunnarsson hreppti fyrsta sætið í prófkjöri Sjálfstæðismanna í Reykjavík. Fékk hann nokkuð afgerandi kosningu eða ríflega helmingi fleiri atkvæði en Guðlaugur Þór Þórðarson sem einnig sóttist eftir fyrsta sæti. Guðlaugur hafnaði í öðru sæti.

Pétur Blöndal fékk þriðja sæti, Ólöf Nordal fjórða og Sigurður Kári Kristjánsson það fimmta. Birgir Ármannsson hafnaði í sjötta sæti, Ásta Möller sjöunda og Erla Ósk Ásgeirsdóttir áttunda.

Jón Magnússon, þingmaður, sem sóttist eftir þriðja sæti en komst ekki á blað yfir 12 efstu menn.

Sjálfstæðisflokkurinn fékk níu þingmenn kjörna í Reykjavík í síðustu kosningum en miðað við nýlegar skoðanakannanir má teljast ólíklegt að flokkurinn fái fleiri en átta í næstu kosningum.

Ármann hafnaði í sjöunda sæti

Bjarni Benediktsson fékk flest atkvæði í fyrsta sæti í prófkjöri flokksins í Suðvesturkjördæmi. Þorgerður Katrín Gunnarsdóttir hafnaði í öðru sæti, Ragnheiður Ríkharðsdóttir í þriðja og Jón Gunnarsson í fjórða. Ármann Kr. Ólafsson, þingmaður sem vildi annað til þriðja sæti endaði í sjöunda sæti. Flokkurinn fékk sex þingmenn í kjördæminu í síðustu kosningum.

Ragnheiður Elín Árnadóttir mun leiða lista sjálfstæðismanna í suðurkjördæmi. Ragnheiður flutti sig frá suðvesturkjördæmi fyrir prófkjörið. Árni Johnsen varð í öðru sæti og Unnur Brá Konráðsdóttir í því þriðja.

Þingmenn höfnuðu í fimmt og sjötta sæti

Þingmennirnir Kjartan Ólafsson og Björk Guðjónsdóttir sem sóttust eftir endurkjöri höfnuðu í fimmta og sjötta sæti. Flokkurinn fékk fjóra þingmenn í kjördæminu í síðustu kosningum.

Kosningaþátta í prófkjörum sjálfstæðisflokksins var mun minni nú en þegar síðast var kosið árið 2006. Alls greiddu rúmlega 17 þúsund manns atkvæði en síðast greiddu tæplega 23 þúsund atkvæði eða sex þúsund fleiri.