Ferguson: Himnaríki eða helvíti

Sir Alex Ferguson, stjóri Manchester United, segist hafa varað við því fyrir löngu að lið hans gæti misst flugið eftir mikla rispu sem kom því á toppinn í úrvalsdeildinni.

Hann vísar því á bug að United sé í vandræðum þrátt fyrir tvo mjög nauma sigra í röð í deildinni þar sem liðið þurfti á kraftaverki að halda frá ítalska táningnum Federico Macheda.

"Þetta er ástæðan fyrir því að ég var að reyna að slá á óraunhæfar væntingar sem bundnar voru við okkur á sínum tíma. Ég veit hvernig fótboltinn er - hann getur sparkað í tennurnar á manni," sagði Ferguson í samtali við News of the World.

"Það er enginn millivegur þegar kemur að okkur. Það er alltaf annað hvort himnaríki eða helvíti. Eina vikuna eigum við að vera í himnaríki og þá næstu í helvíti. Hvað á maður að gera í því? Taka í spaðann á djöflinum?"

Sá gamli er handviss um að United geti farið áfram í einvíginu við Porto þó staðan sé þannig að liðið þurfi helst að vinna Porto á útivelli í síðari leiknum - nokkuð sem engu ensku liði hefur tekist til þessa.

"Við verðum að komast fyrr inn í þann leik en fyrri leikinn og finna taktinn fyrr. Ef við náum okkur strax á flug, getum við gert þeim lífið leitt. Ég horfði á síðasta leik þeirra á heimavelli í keppninni og þar voru þeir aldrei að reyna að skora. Þeir spiluðu bara stífan varnarleik. Slíkt er hættulegt á móti okkur því við vitum að við getum alltaf skorað," sagði Ferguson.