Hull hefur áhuga á Owen

Enska úrvalsdeildarfélagið Hull hefur áhuga á að fá Michael Owen í sínar raðir. Þetta staðfesti Paul Duffen, stjórnarformaður félagsins, í samtali við enska fjölmiðla.

Duffen segir að félagið vilji semja við Owen á réttum forsendum. Samningur Owen við Newcastle rennur út í lok mánaðarins og hafa fulltrúar hans sent nokkrum úrvalsdeildarfélögum ferilsskrá hans.

Everton hefur einna helst verið orðað við Owen en Hull hefur hug á að blanda sér í slaginn.

Enska götublaðið News of the World segir að Hull sé reiðubúið að borga Owen 40 þúsund pund í grunnlaun á viku. Hann fengi svo 20 þúsund pund fyrir hvern leik og 10 þúsund pund fyrir hvert mark sem hann skorar.

Hull ætlar að bjóða Owen eins árs samning sem hægt er að framlengja um eitt ár til viðbótar ef hann tekur þátt í minnst fimmtán leikjum á næsta tímabili.

„Hann er frábær knattspyrnumaður. Hann hefur átt við ýmis meiðslavandræði að stríða en við höfum áhuga á honum. Við höfum mikinn metnað sem knattspyrnufélag og viljum sýna þann metnað."