Ronaldo var búinn að ákveða að fara

Cristiano Ronaldo var búinn að ákveða að fara til Real Madrid áður en Manchester United mætti Barcelona í úrslitum Meistaradeildar Evrópu nú í vor.

Þetta segir Zoran Tosic, leikmaður United, í samtali við enska fjölmiðla í dag.

„Hann sagði að hann væri búinn að vinna öll verðlaunin og að hann vildi prófa eitthvað nýtt," sagði Tosic. „En ég veit ekki hvort hann var búinn að semja við Real þá."

„Hann verður besti leikmaður heims á nýjan leik. Hann skoraði 42 mörk í fyrra og 27 í ár. Allir sögðu að það hefði verið hans versta tímabil vegna þess að það var ekki nóg. En hann verður bestur á ný í Madríd á næsta ári."