Morðingjanum í Þýskalandi lýst sem venjulegum unglingi

Hinn sautján ára gamli Tim Kretschmer sem vopnaður byssu myrti fimmtán manns í og nærri gagnfræðiskóla í suðvesturhluta Þýskalands er lýst sem venjulegum unglingi

Morðinginn útskrifaðist úr skólanum fyrir ári síðan og er hann sagður hafa staðið ágætlega í námi. Þýskir fjölmiðlar segja að Kretschmer hafi nýverið hafið iðnnám. Þá er því haldið fram að hann hafi verið góður borðtennisspilari og þráð að gerast atvinnumaður í greininni.

Drengurinn féll í skotbardaga við lögreglu í dag. Á þessari stundu er ekki vitað með vissu af hverju Kretschmer framdi ódæðin.

Réðst inn í skólann klæddur felubúning

Kretschmer gekk inn í skólabygginguna skömmu fyrir klukkan níu í morgun að íslenskum tíma, klæddur í felubúning að hætti hermanna og vopnaður byssum. Hann skaut á alla sem fyrir honum urðu. Níu nemendur féllu í árásinni og þrír kennarar. Margir særðust.

Kretschmer hljóp síðan út, skaut bifreiðaeiganda fyrir utan skólann til bana, stal bíl hans og lagði á flótta.

Lögregla hafði upp á Kretschmer skömmu síðar í bænum Wendlingen í um fjörutíu kílómetra fjarlægð frá skólanum. Þar kom til skotbardaga á bílasölu. Tveir vegfarendur féllu þar og Kretschmer einnig. Tveir lögreglumenn særðust lífshættulega.

Nokkrar árásir gerða á þýskum skólum síðustu ár

Nokkrar skotárásir hafa verið gerðar í þýskum skólum síðustu ár. Sú mannskæðasta var gerð í skóla í borginni Erfur í austurhluta Þýskalands 2002. Þá myrti fyrrverandi nemandi sautján manns áður en hann svipti sig lífi.