Tíu bestu ummæli Brian Clough

The Sun hefur tekið saman þau tíu bestu ummæli sem knattspyrnustjórinn Brian Clough lét falla á sínum tíma.

Clough náði frábærum árangri sem knattspyrnustjóri í Englandi, allra helst með Nottingham Forest. En hann stýrði Leeds í 44 daga árið 1974 og hefur verið gerð kvikmynd um veru hans hjá félaginu. Hún ber heitið The Damned United og verður frumsýnd í Bretlandi síðar í mánuðinum. Sýnishorn úr myndinni má sjá hér.

Clough var frægur fyrir ummæli sín og má lesa nokkur þeirra hér fyrir neðan.

10. Um hvernig hann tók á leikmönnum sem voru til vandræða.

„Við tölum saman í 20 mínútur og ákveðum svo að ég hafði rétt fyrir mér."

9. ... og þá sérstaklega Roy Keane.

„Ég sló Roy aðeins einu sinni. Hann stóð upp mjög fljótt þannig að það getur ekki hafa verið mjög þungt högg."

8. Um að verða af starfi landsliðsþjálfara Englands.

„Ég er viss um að þeir sem stjórna landsliðinu héldu að ég myndi vilja stjórna öllu ef ég yrði ráðinn. Það var klókt af þeim því það er nákvæmlega það sem ég hefði gert."

7. Um knattspyrnuna almennt.

„Ef Guð hefði kosið að við myndum spila knattspyrnu í skýjunum hefði hann lagt niður gras þarna uppi."

6. Um innrás erlendra knattspyrnumanna til Englands.

„Ég get ekki einu sinni stafsett spagettí hvað þá talað ítölsku. Hvernig gæti ég sagt Ítala að ná boltanum - hann gæti náð mínum (balls)."

5. Um þá sem ráða knattspyrnufélögunum.

„Ef stjórnarformaður rekur knattspyrnustjóra sem hann réði sjálfur - ætti hann sjálfur að fjúka líka."

4. Clough gefur Beckham-hjónunum David og Victoriu heilræði.

„Hann ætti að finna söngkennara fyrir hana því hún er engan veginn jafn fær í sínu starfi og hann."

3. Um sína yfirnáttúrulegu hæfileika.

„Áin Trent er yndisleg. Það veit ég því ég hef gengið á henni í átján ár."

2. En hann hefði kannski átt að nota hæfileika sína á annan máta.

„Ganga á vatni? Ég veit um marga sem segja að í stað þess að ganga á vatni ætti ég frekar að fá meira af vatni með drykkjunum mínum. Og það er alveg rétt hjá þeim."

1. Setningin sem lýsir Clough ef til vill best.

„Ég myndi ekki segja að ég væri besti knattspyrnustjórinn í bransanum. En ég er í topp einum."