Keegan orðaður við Southampton

Svo gæti farið að Kevin Keegan snúi aftur til Southampton og taki við knattspyrnustjórn liðsins ef marka má fréttir í enskum fjölmiðlum.

Keegan lék með Southampton árin 1980 til 1982, eftir að hann kom aftur til Englands frá Hamburg og áður en hann fór til Newcastle þar sem ferli hans lauk í enska boltanum.

Southampton hefur átt í miklum erfiðleikum undanfarin misseri og féll í ensku C-deildina í vor eftir að eignarhaldsfélagið sem á Southampton var sett í greiðslustöðvun í byrjun apríl.

Leon Crouch, fyrrum stjórnarformaður félagsins, fer fyrir fjárfestingarhópi sem mun líklega eignast félagið á næstu vikum. Crouch hefur þó neitað því að félagið hafi átt í viðræðum við Keegan um að taka að sér stöðu knattspyrnustjóra.

Orðrómur um þetta fór á kreik eftir að þeir Keegan og Crouch voru myndaðir saman en einnig þeir Keegan og Matt Le Tissier, sem verður nýr stjórnarformaður Southampton ef yfirtakan tekst.