Framkvæmdir við gagnaver Björgólfs Thors hafnar

Umhverfisstofnun hefur gefið út starfsleyfi fyrir Kísilverksmiðju í Helguvík og varaaflstöð rafræns gagnavers að Ásbrú. Bæði fyrirtækin eru í Reykjanesbæ.

Í útgefnu starfsleyfi vegna kísilverksmiðju sem fyrirhugað er að starfrækja í Helguvík, í Reykjanesbæ, er heimilt að framleiða 50 þúsund tonn af hrákísli samkvæmt tilkynningu frá Reykjanesbæ, en Íslenska kísilfélagið fyrirhugar að vinna sólarkísil til framleiðslu á sólarhlöðum í öðru skrefi framleiðslunnar.

Um 150 manns munu verða við vinnu á byggingartíma sem áætlaður er 2 ár. Gert er ráð fyrir að útboð verkefna hefjist í nóvember. Starfsmannafjöldi í verksmiðju í þessum fyrsta áfanga er um 90 manns.

Þá hefur Umhverfisstofnun samþykkt starfsleyfi fyrir varaflsstöð vegna gangavers Verne Holdings ehf., að Ásbrú í Reykjanesbæ. Gagnaverið er meðal annars í eigu Novators sem Björgólfur Thor Björgólfsson á.

Framkvæmdir eru hafnar við gagnaverið en stór hluti þess nýtir vöruskemmur sem fyrir voru að Ásbrú með umtalsverðum breytingum innanhúss.