Sprenging í haldlagningu stera

Tollgæslan hefur lagt hald á rúmlega sjö lítra af anabólískum sterum í fljótandi formi það sem af er þessu ári og tæplega 80.000 steratöflur. Þetta kemur fram í tilkynningu frá tollstjóraembættinu í Reykjavík en þar segir enn fremur að fyrstu tíu mánuði síðasta árs hafi tollurinn lagt hald á 10.000 steratöflur og 1,2 lítra af sterum í vökvaformi. Aukningin er því veruleg milli ára. Innflytjendur steranna leggja mikið á sig við að hylja sendingar sínar og eru umbúðir af ólíklegasta tagi gjarnan notaðar til að villa um fyrir tollgæslunni. Innflutningur á sterum, án þess að leyfi yfirvalda liggi fyrir, er ólöglegur og varðar við lyfjalög.

Hér má sjá nokkur dæmi um felustaði við sterasmygl. Myndirnar eru á heimasíðu tollgæslunnar.