Umfjöllun: KR vann Fjölni eftir að hafa lent undir

KR-ingar minnkuðu forystu FH í deildinni niður í tíu stig þegar þeir sóttu sigur í Grafarvoginn gegn Fjölni. Líkt og þegar liðin áttust við í fyrri umferðinni unnu KR-ingar eftir að hafa lent undir.

Fjölnismenn byrjuðu með sömu uppstillingu og tryggði þeim sigur gegn Stjörnunni í síðustu umferð. Liðið var vel varnarsinnað eins og það hefur verið síðustu leiki.

Hjá KR tók Bjarni Guðjónsson út leikbann og Eggert Rafn Einarsson var í byrjunarliðinu í fyrsta sinn í sumar en hann lék í hægri bakverðinum. Þá lék Guðmundur Reynir Gunnarsson sinn fyrsta leik í Pepsi-deildinni síðan hann kom frá GAIS.

KR réði ferðinni algjörlega í fyrri hálfleiknum en Hrafn Davíðsson var öryggið uppmálað í marki Fjölnis og varði nokkrum sinnum vel. En Fjölnismenn komust hinsvegar yfir gegn gangi leiksins eftir mistök hjá Jordao Diogo í vörn KR. Tómas Leifsson átti fasta fyrirgjöf sem Stefán Logi Magnússon hélt ekki og Húsvíkingurinn Andri Valur Ívarsson nýtti sér það og skoraði. Andri var að skora í öðrum leik sínum í röð.

Fimm mínútum eftir þetta mark, eða á 27. mínútu, jafnaði KR. Eftir laglegt þríhyrningaspil skoraði Björgólfur Takefúsa með föstu skoti eftir sendingu Gunnars Arnar Jónssonar. Staðan var jöfn í hálfleik 1-1 þrátt fyrir að KR-ingar hefðu verið mun meira með boltann.

Fjölnismenn komu sprækir til leiks í seinni hálfleik og voru nálægt því að skora. Andri Valur átti til dæmis stórhættulegt skot sem fór naumlega framhjá. En ekki komu heimamenn inn öðru marki og var þeim refsað fyrir það á 67. mínútu þegar Prince Rajcomar skoraði sigurmarkið.

Prince var nýkominn inn sem varamaður þegar hann fékk sendingu frá Gunnari Erni og kom boltanum í netið. Á lokakafla leiksins áttu bæði lið hættulegar sóknir en fleiri urðu mörkin ekki og KR vann því 2-1 sigur.

Fjölnir - KR 1-2

1-0 Andri Valur Ívarsson (22.)

1-1 Björgólfur Takefusa (27.)

1-2 Prince Rajcomar (67.)

Fjölnisvöllur. Áhorfendur: 1.614

Dómari: Magnús Þórisson (6)

Skot (á mark): 10-14 (2-9)

Varin skot: Hrafn 7 - Stefán 1

Hornspyrnur: 5-5

Rangstöður: 2-2

Aukaspyrnur fengnar: 11-8

Fjölnir (5-2-3)

Hrafn Davíðsson 7

Illugi Þór Gunnarsson 6

(87. Ágúst Þór Ágústsson -)

Ásgeir Aron Ásgeirsson 6

Ólafur Páll Johnson 6

Gunnar Valur Gunnarsson 5

Vigfús Arnar Jósepsson 6

(73. Olgeir Sigurgeirsson -)

Magnús Ingi Einarsson 5

Gunnar Már Guðmundsson 5

Tómas Leifsson 7

Jónas Grani Garðarsson 6

Andri Valur Ívarsson 7

(73. Ragnar Heimir Gunnarsson -)

KR (4-4-2)

Stefán Logi Magnússon 5

Eggert Rafn Einarsson 5

Mark Rutgers 7

Grétar Sigfinnur Sigurðarson 7

Jordao Diogo 5

Óskar Örn Hauksson 7

Jónas Guðni Sævarsson 7

Baldur Sigurðsson 6

Guðmundur Reynir Gunnarsson 6

(65. Prince Rajcomar 7)

*Gunnar Örn Jónsson 7 - Maður leiksins

(70. Gunnar Kristjánsson 6)

Björgólfur Takefusa - 7

(76. Guðmundur Benediktsson -)