Vermaelen í læknisskoðun á morgun

Belginn Thomas Vermaelen segir að hann muni á morgun gangast undir læknisskoðun hjá enska úrvalsdeildarfélaginu Arsenal.

Vermaelen hefur verið sagður á leið til Arsenal undanfarnar vikur en Arsene Wenger, stjóri Arsenal, hefur enn ekki tjáð sig opinberlega um málið.

Vermaelen er varnarmaður og leikur með Ajax í Hollandi en umboðsmaður hans segir að stutt sé í að aðilar komist að samkomulagi um fjögurra ára samning.

„Það á eftir að skrifa undir en annars er allt frágengið," sagði Vermaelen í samtali við belgíska fjölmiðla. „Á föstudaginn fer ég til Lundúna til að gangast undir læknisskoðun. Þá vonast ég til að skrifa undir."

„Ég er virkilega stoltur af þessu. Arsenal er frábært félag."