Dossena vill vera áfram hjá Liverpool

Ítalski bakvörðurinn Andrea Dosssena segist vilja vera áfram hjá Liverpool og ætlar að berjast fyrir sínu sæti í byrjunarliði félagsins.

Dossena hefur verið sagður á leið frá Liverpool þar sem að allt útlit er fyrir að Glen Johnson sé á leið til félagsins frá Portsmouth.

Hann var keyptur í fyrra fyrir sjö milljónir punda frá Udinese en var í byrjunarliði Liverpool í aðeins tólf deildarleikjum á undanförnu tímabili. Hann hefur síðustu daga verið orðaður við Juventus.

„Ég sagðist aldrei vilja fara frá Liverpool," sagði Dossensa við enska fjölmiðla. „Ég er ánægður hjá Liverpool og vil vera þar áfram."