Maradona: Þið megið éta orð ykkar

Diego Maradona nýtti tækifærið eftir að Argentína tryggði sér í gær sæti á HM í Suður-Afríku og skaut föstum skotum á gagnrýnendur sína.

Argentína vann í gær 1-0 sigur á Úrúgvæ á útivelli og tryggði sér þar með farseðilinn til Suður-Afríku. Liðið hefur þó oft náð betri árangri í undankeppninni og hefur Maradona verið gagnrýndur fyrir störf sín sem landsliðsþjálfari.

„Ég vil segja þeim sem gagnrýndu mig og fóru með mig eins og hvert annað rusl að þeir mega éta orð sín," sagði Maradona. „Þessi sigur er tileinkaður þeim sem höfðu trú á okkur en ekki fyrir þá sem sögðu lygar um okkur. Ég ætla ekki að nefna nein nöfn en þeir vita hver þeir eru."

„Ég var alltaf viss um að liðið mitt myndi komast áfram. Ég bað leikmenn um að nota þennan leik til að sýna hvað í þeim býr og það gerðu þeir."

„En aðrir mega éta orð sín," bætti Maradona við.

Maradona sagðist þó ekki geta lofað því að hann yrði áfram landsliðsþjálfari og myndi því stýra liðinu á HM á næsta ári. „Ég veit það ekki. Ég verð að ræða fyrst við Julio Grondona (einn forráðamanna argentínska knattspyrnusambandsins) og svo mun ég taka ákvörðun."

Juan Sebastian Veron sagði hins vegar eftir sigurinn að það hefði margt verið að hjá Argentínumönnum í undankeppninni og að mörgu þyrfti að breyta og að endurskipulagningar væri þörf.

„Forsetinn, stjórnarmeðlimir, þjálfararnir og leikmenn þurfa allir að taka þátt í þessu ferli. Nú gefst okkur tími til að laga það sem hefur verið að svo við getum mætt með okkar allra sterkasta lið til Suður-Afríku."