Hermann búinn að semja við Portsmouth

Landsliðsfyrirliðinn Hermann Hreiðarsson hefur ákveðið að endurnýja samning sinn við enska úrvalsdeildarfélagið Portsmouth en Ólafur Garðarsson umboðsmaður hans staðfesti fregnirnar í samtali við Vísi.

„Hermann er búinn að skrifa undir eins árs samning við Portsmouth með möguleikann á framlengingu um eitt ár til viðbótar. Hann er búinn að vera mjög ánægður hjá Portsmouth og í ensku úrvalsdeildinni þannig að það er erfitt að snúa bakinu við því," segir Ólafur.

Hermann hefur verið orðaður við fjöldan allan af félögum upp á síðkastið og Ólafur staðfestir að mörg félög hafi verið á höttunum eftir varnarmanninum.

„Það voru mörg félög á eftir Hermanni og það er bara viðurkenning fyrir það hvernig leikmaður hann er. Hann hefði getað fengið lengri samning annars staðar en er ánægður hjá Portsmouth. Það voru fjöldi félaga í ensku b-deildinni sem sóttu hart að því að fá hann í sínar raðir," segir Ólafur.

Hinn 34 ára gamli Hermann hefur verið í tvö tímabil hjá Portsmouth.