Tottenham vann West Ham í Kína

Það var boðið upp á Lundúnaslag í opnunarleik Asíu-bikars æfingarmótsins í dag þegar Tottenham vann West Ham 1-0 í Peking í Kína.

Jermain Defoe, fyrrum leikmaður West Ham, skoraði eina mark leiksins fyrir Tottenham þegar stundarfjórðungur lifði leiks í fremur bragðdaufum leik þar sem Tottenham réð þó ferðinni nær allan leikinn.

Bæði liðin stilltu upp sterkum byrjunarliðum í leiknum en West Ham varð fyrir áfalli þegar miðjumaðurinn Luis Boa Morte þurfi að yfirgefa völlinn snemma leiks vegna hnémeiðsla.

Hull og Beijing Guoan mætast í seinni leiknum í æfingarmótinu í dag en sigurliðið úr þeim leik mætir Tottenham svo í úrslitaleik mótsins.