Orkuöflun fyrir álver gæti tekið tugi ára

Uppbygging jarðhitasvæða til orkuöflunar hefur tekið áratugi og ljóst er að slík svæði á Reykjanesi verða ekki tilbúin í bráð. Enn á eftir að rannsaka svæðin og óljóst er hve mikla orku þau gefa eða hvenær hún verður nýtanleg.

Ólafur G. Flóvenz, forstjóri Íslenskra orkurannsókna, bendir á að uppbygging á Nesjavöllum hafi tekið um tuttugu ár og í Svartsengi þrjátíu ár. Menn hefðu getað unnið hraðar, en best sé að uppbyggingin sé hófsöm og í skrefum.

„Það er mjög mikil orka bundin í þessu og það er langt, langt umfram það sem við getum notað, en ég vil taka það fram að þetta er ekkert í hendi. En þegar menn eru að ræða um hvort nóg orka er aðgengileg fyrir álver af tiltekinni stærð skiptir tímaramminn gríðarlegu máli.

Ef spurt er: Geturðu útvegað þessa orku árið 2012? er svarið væntanlega nei. Það er ekki hægt að útvega orkuna fyrir 360 þúsund tonna álver árið 2012, enda eru menn náttúrlega að hugsa um að byggja þetta upp í áföngum, á einhverjum óskilgreint löngum tíma. Það byggist auðvitað ekkert upp öðruvísi en orkan fáist.“

Ólafur segir að til að svara spurningum um hve mikil orka sé á svæðinu verði að halda rannsóknarborunum áfram. Þær standi allar meira eða minna fastar í leyfismálum. „Menn þurfa að halda þeim áfram á ákveðnum skynsamlegum hraða til að geta svarað þessum spurningum, um hve mikið og hvenær.“

Framkvæmdir eru hafnar við álver Norðuráls í Helguvík og stefnir fyrirtækið að því að það geti framleitt 360 þúsund tonn af áli árlega. Slíkt álver þarf 625 megavött af orku. Líkt og Fréttablaðið greindi frá í gær er fyrirhugað að reisa álverið í fjórum níutíu þúsund tonna áföngum.

Vonast er til að fyrsti áfanginn verði tilbúinn 2012. Miðað við þetta verður fullbúið 360 þúsund tonna álver tilbúið 2015 til 2016. Óvíst er þó hvaðan orkan í það mun koma.

„Það er alltaf heppilegra að byggja jarðhitann frekar hægt upp. Það er eðli kerfanna, þetta er allt öðruvísi en vatnsaflið, þar þekkja menn ána og vita hve mikið vatn rennur í henni, þannig að hægt er að ganga að ákveðinni stærð af virkjun vísri. Í jarðhitanum er það reynslan sem sker úr um þetta. Þá er óvarlegt að fara af stað með mjög stór orkuver á einu litlu svæði.“

Ragnar Guðmundsson, forstjóri Norðuráls, segist litlar áhyggjur hafa. Samkvæmt mati á virkjanaáhrifum á suðvesturhorninu sé næg orka til fyrir álverið í Helguvík og aðra starfsemi. Orka Hellisheiðarvirkjunar hafi verið vanmetin, auk þess sem Landsvirkjun eigi enn óselda orku í kerfum sínum.

kolbeinn@frettabladid.is