Guðmundur aftur til Keflavíkur

Besti leikmaður Landsbankadeildarinnar í fyrra, Guðmundur Steinarsson, snýr aftur í raðir Keflavíkur þegar félagaskiptaglugginn opnar á ný þann 15. júlí. Þetta staðfestir Kristján Guðmundsson, þjálfari Keflavíkur, við Víkurfréttir.

Guðmundur lék með Vaduz frá Liechtenstein í svissnesku deildinni í vetur.

Framherjinn átti frábært tímabil með Keflavík í fyrra og mun reynast Keflvíkingum mikilvægur liðsstyrkur á seinni hluta tímabilsins.

Veitir ekki af þar sem Suðurnesjaliðinu hefur ekki tekist að hanga í toppliðunum það sem af er sumri en Keflavík hefur verið óheppið með meiðsli lykilmanna og hópurinn ekki sá breiðasti.