Arsenal vill fá Hitzlsperger

Enska götublaðið The Sun segir að Arsenal sé nú að íhuga að gera tilboð í Þjóðverjann Thomas Hitzlsperger, leikmann og fyrirliða Stuttgart.

Fram kemur í grein The Sun að Arsenal sé reiðubúið að borga sex milljónir evra fyrir Hitzlsperger sem lék með Aston Villa frá 2000 til 2005. Henn hefur síðan þá leikið með Stuttgart.

Arsenal er sagt enn vera að leita að sterkum miðvallarleikmanni til að fylla skarð Mathieu Flamini sem fór til AC Milan fyrir ári síðan.

Núverandi samningur Hitzlsperger við Stuttgart rennur út í lok næstu leiktíðar sem eykur líkurnar á því að félagið vilji selja hann nú frekar en að sleppa honum frítt næsta sumar.