Valur Fannar: Áttum að vinna stærri sigur

Valur Fannar Gíslason átti fínan leik fyrir Fylki í 1-3 sigrinum gegn Fjölni í dag. Hann var vitanlega sáttur með stigin þrjú en hefði viljað sjá lið sitt skora fleiri mörk.

„Það er glæsilegt að taka stigin þrjú en við áttum bara að vinna stærri sigur. Við skoruðum þrjú mörk en fengum helling af dauðafærum sem fóru forgörðum. Varnarleikurinn var annars þéttur og ég held að þeir hafi fengið eitt eða tvö skallafæri utan við þetta glæsilega mark sem þeir skoruðu með langskoti. Þannig að við getum ekki kvartað mikið," segir Valur Fannar.

Fyrirliðinn varar liðsfélaga sína samt við að halda áfram á sömu braut og enn sé langt í land með að liðið nái markmiðum sínum í sumar.

„Þetta er vissulega gott, ennþá. En þetta getur fljótt breyst og við erum ekkert að gera okkur grillur um eitt né neitt svona snemma móts. Við verðum að standa okkur áfram vel til þess að gera betur en í fyrra þegar við lentum í sjöunda sæti. Stefnan er að gera betur en í fyrra og við erum ennþá undir pari með það alla vega," segir Valur Fannar en Fylkir skaust upp í annað sætið með sigrinum í dag.