Kvarta undan aukaverkunum

Viðbúnaðarstig á Landspítalanum hefur verið hækkað vegna álags út af svínaflensunni. Góður skriður er kominn á bólusetningu gegn flensunni, en þó er kvartað undan því að hún valdi aukaverkunum hjá meirihluta þeirra sem hana fá.

Meira reyndi á starfsemi Landspítala í gær vegna inflúensunnar en nokkru sinni fyrr frá því faraldurinn hófst og var viðbúnaður á spítalanum færður á svokallað virkjunarstig, sem þýðir að hugsanlega gæti þurft að draga úr innlögnum sjúklinga og fresta þeim aðgerðum sem unnt er að fresta. Tæp sjö þúsund hafa nú greinst með inflúensuna, en bólusetning gegn henni hefur gengið vel. Margir kvarta þó um talsverðar aukaverkanir, að sögn Más Kristjánssonar, yfirlæknir á smitsjúkdómadeild Landspítalans.

Óþægindin koma fram hjá um 60-80% þeirra sem eru bólusettir og lítill hluti fólks fær væg flensulík einkenni að auki. Athyglisvert er að konum er hættara við aukaverkunum af völdum bóluefnisins er körlum.

Bólusetningin er að sögn Más hættulaus og engin ástæða til að leita læknis út af aukaverkunum, nema ef óvanaleg einkenni gera vart við sig eins og dofi eða mikið máttleysi.