Bílar í einkaeigu notaðir við lögregluaðgerðir

Jeppi og rúta í einkaeigu voru meðal þeirra farartækja sem notuð voru til að stöðva ökuníðinginn sem ók stolnum bíl á ofsahraða undan lögreglu inn Hvalfjörðinn í gærkvöld.

Bílunum hafði verið lagt þvert yfir veginn í Hvalfirðinum og var ætlað að skapa vegatálma til að fyrirbyggja að maðurinn kæmist á þjóðveg eitt. Bíllinn var þó neyddur út af veginum áður en hann kom að tálmanum.

Í fréttum RÚV er sagt frá því að bílarnir hafi verið gerðir upptækir.

Samkvæmt upplýsingum frá lögreglu kemur ekkert fram í bókun um málið um tildrög þess að bílarnir tveir voru notaðir í aðgerðum lögreglu. Gunnar Hilmarsson, aðalvarðstjóri, segist þó ekki telja að lögregla hafi tekið bílana ófrjálsri hendi og þótti líklegra að vegfarendurnir hefðu boðið fram aðstoð sína.

Þó er ljóst að lögregla hefur heimild til að kveða sér til aðstoðar almenna borgara, og ber þeim skylda til að verða við því ef velferð þeirra er ekki stofnað í hættu.

Í lögreglulögum kemur fram að slíkir meðreiðarsveinar lögreglu njóta sömu verndar og aðrir lögreglumenn, meðal annars til bótagreiðslu úr ríkissjóði vegna munatjóns.

Þeim, sem geta veitt nánari upplýsingar um tildrög þess að bílarnir voru notaðir í vegatálmann, er bent á að hafa samband við fréttastofu í síma 512-5200.