Davenport byrjaður að æfa á ný með West Ham eftir hnífsárásina

Varnarmaðurinn Calum Davenport hjá West Ham varð sem kunnugt er fyrir hrottalegri áras í ágúst síðast liðnum þegar mágur hans stakk hann ítrekaði í báða fætur með hníf og um tíma var útlit fyrir að fjarlægja þyrfti aðra löppina á honum.

Davenport hefur hins vegar náð góðum bata og er nýlega byrjaður að mæta á æfingarsvæði West Ham knattspyrnustjóranum Gianfranco Zola til mikillar ánægju.

„Calum er að standa sig mjög vel í endurhæfingunni. Hann má byrja að hjóla og synda og það er framar vonum hversu fljótt hann hefur náð sér.

Ástand hans verður tekið til skoðunar aftur eftir mánuð og þá sjáum við betur hvort og þá hvernær hann getur byrjað að spila fótbolta aftur. Það er alla vega mjög hvetjandi fyrir alla að sjá Calum aftur á æfingarsvæðinu," segir Zola í viðtali á opinberri heimasíðu West Ham.