Engin boð í Davies

Samkvæmt heimildum fréttastofu Sky Sports mun Blackburn ekki enn hafa lagt fram tilboð í Kevin Davies, leikmann Bolton.

Enskir fjölmiðlar fullyrða margir í dag að Sam Allardyce, stjóri Blackburn og fyrrum stjóri Bolton, sé áhugasamur um að fá Davies í sínar raðir. Allardyce keypti Davies til Bolton frá Southampton árið 2003.

Davies er 32 ára gamall og væri hugsaður sem eftirmaður Roque Santa-Cruz sem er á leið til Manchester City.

Hann lék þó með Blackburn í eitt tímabil, frá 1997 til 1998 en átti ekki góðu gengi að fagna þar. Hann skoraði aðeins tvívegis fyrir Blackburn sem keypti hann á 7,5 milljónir punda frá Southampton.

Davies var markahæsti leikmaður Bolton á nýliðnu tímabili auk þess sem hann tók við fyrirliðabandinu og var sagður nálægt því að vinna sér sæti í enska landsliðinu.