Gengi krónunnar verður ekki handstýrt

Steingrímur J. Sigfússon, fjármálaráðherra, segir að afborgarnir erlendra lána verði greiddar með þeim lánum sem fást í kjölfar endurskoðunar Alþjóðagjaldeyrissjóðsins í dag ef þörf kröfur. Hann segir að gengi krónunnar verði ekki handstýrt með inngripum á gjaldeyrismarkaði. Þetta kom fram í seinnifréttum Ríkissjónvarpsins í kvöld.

Alþjóðagjaldeyrissjóðurinn afgreiddi í dag fyrstu endurskoðun á efnahagsáætlun Íslands. Endurskoðunin hefur tafist í átta mánuði en upphaflega stóð til að hún færi fram í febrúar á þessu ári. Bretar og Hollendingar beittu sér hins vegar gegn málinu á meðan Icesave deilan var óleyst.

Afgreiðslan í dag mun hafa jákvæð áhrif á íslenskt efnahagslíf að mati sérfræðinga. Seðlabankinn getur hafið afnám gjaldeyrishafta og í kjölfarið þykir líklegt að krónan muni styrkjast. Þá telja ennfremur margir að þetta styrki tiltrú erlendra aðila á íslensku efnahagslífi.



„Þetta er auðvitað fyrst og fremst lán inn í gjaldeyrisvaraforðann. Hann er síðan að sjálfsögðu nýttur þegar kemur að hlutum eins og afborgunum erlendra lána ef á þarf að halda," sagði Steingrímur í fréttum Rúv.

Steingrímur sagði ekki standa til að að nýta aukinn gjaldeyrisvaraforða til að halda uppi gengi krónunnar.