Zaki loksins mættur

Amr Zaki er loksins mættur til vinnu sinnar hjá enska úrvalsdeildarfélaginu Wigan. Þetta er í fimmta sinn sem hann mætir einhverjum dögum of seint til baka úr landsliðsfríi.

Zaki spilaði með egypska landsliðinu um þarsíðustu helgi og fyrr í vikunni sagði Steve Bruce, stjóri Wigan, að þetta væri óásættanleg hegðun. Þá var hann ekki enn mættur til baka.

Bruce mun hitta Zaki og talsmenn hana á fundi á morgun þar sem farið verður yfir málið. Má búast við hitafundi enda talaði Bruce opinskátt um það sem honum þætti um hegðun Zaki.

„Þetta er ekki í fyrsta skipti sem þetta gerist heldur líklega í fimmta skiptið. Slíkt á ekki að geta gerst. Við munum ræða við hann og hans menn á næsta sólarhring og þá kemur betur í ljós hvernig ástandið er. Eins og staðan er nú get ég engan veginn gert mér grein fyrir hver framtíð hans er hjá félaginu," sagði Steve Bruce í dag.

„Framkoma hans er ekki til fyrirmyndar. En þegar starfsmaður ætlar að haga sér nákvæmlega eins og hann vill þá munu koma upp árekstrar."

Zaki er í láni hjá Wigan frá egypska félaginu El Zamalek.