Auðun: Afar kærkomið

Auðun Helgason, fyrirliði Fram, sagði sigur sinna manna á KR í dag vera langþráðan og afar kærkominn.

Þetta var fyrsti sigur Fram í deildinni síðan í 1. umferð en liðið vann reyndar sigur í bikarkeppninni fyrr í vikunni. „Við ætluðum okkur svo stóra hluti en vorum komnir fram úr okkur," sagði Auðun eftir leikinn. „Við þurftum að komast niður á jörðina og vinna sem eitt lið. Þetta verður gott veganesti í næstu leiki en við sýndum og sönnuðum fyrir sjálfum okkur að við getum gert ýmislegt ef við spilum sem ein liðsheild."

„Við vorum með neistann í dag sem okkur hefur vantað. Okkur langaði meira í sigurinn í dag og það var meira hungur í leikmönnum Fram. Þetta var flottur sigur á góðu KR-liði."