Tekst Burnley hið ómögulega?

Burnley tekur í kvöld á móti Tottenham í síðari undanúrslitaleik liðanna í enska deildabikarnum.

Þar þarf B-deildarliðið á kraftaverki að halda ef það ætlar sér í úrslitaleikinn eftir að hafa tapað fyrri leiknum 4-1 á White Hart Lane.

Burnley hafði reyndar yfir 1-0 í hálfleik en Tottenham héldu engin bönd í síðari hálfleik þar sem liðið tryggði sér auðveldan sigur.

Jóhannes Karl Guðjónsson verður væntanlega með liði Burnley í kvöld en hann meiddist reyndar í fyrri leik liðanna á dögunum. Hann var í byrjunarliði Burnley í deildarleik um síðustu helgi.

Tottenham á titil að verja í keppninni og mætir Manchester United í úrslitum ef ekki kemur til stórslys í kvöld. Í liðið vantar nokkra lykilmenn í kvöld, þ.a.m. fyrirliðann Ledley King sem er meiddur á læri.

Markvörðurinn skrautlegi Heurelho Gomes er meiddur og útlit er fyrir að Harry Redknapp gefi hinum unga Ben Alnwich tækifæri í hans stað.

Bein útsending frá leiknum hefst klukkan 19:40 á Stöð 2 Sport.